Funcións do Servizo Galego de Saúde
As estratexias do Servizo Galego de Saúde van encamiñadas a:
- Optimizar os dispositivos asistenciais integrados nela, mediante a distribución equitativa dos recursos económicos afectos ao financiamento dos servizos e prestacións de asistencia sanitaria de cobertura pública, mediante a dobre función de compra e provisión de servizos sanitarios, que se exercerán de forma separada
- Garantir os dereitos da cidadanía
- Modernizar e humanizar o Sistema Público de Saúde de Galicia, incorporando modelos de xestión que o dinamicen
- Promover a continuidade asistencial mediante unha organización centrada no paciente como base para asegurar a calidade da asistencia, que supere a tradicional separación entre a atención primaria e a atención especializada e que abranga a atención socio - sanitaria, integrando todas as modalidades asistenciais de atención ao usuario
- Introducir fórmulas organizativas cunha visión lonxitudinal e integradora dos procesos asistenciais baseada na continuidade da atención sanitaria, co fin de acadar a coordinación, colaboración e cooperación de todos os provedores públicos, tendo como centro de atención o paciente, ao cal se lle deben garantir unha calidade obxectiva e uns tempos de atención axeitados
Baixo a tutela da Consellería de Sanidade, desenvolve as funcións seguintes:
- A prestación de asistencia sanitaria a través dos centros, servizos e establecementos da rede galega de atención sanitaria de utilización pública
- A distribución dos recursos económicos necesarios para financiar as actividades asistenciais prestadas polos mesmos
- O goberno, a dirección e a xestión dos centros, servizos e establecementos sanitarios propios ou adscritos ó Servizo Galego de Saúde
- A coordinación e a xestión dos recursos humanos, materiais e financeiros asignados
- A execución e o desenvolvemento de programas de docencia e investigación